24.5.07

ايفكوات

لما كثرت المشاوير لقيت لابد من التقفيص شوية , يعني بلاش من التاكسي الخاصة كل يوم وخلي نركب ايفكو مرة مرة , الايفوكوات كما هو متعارف عليها هي عبارة عن شبكة مواصلات يديرها مجموعة من الشباب السكونيس ( المردف) المؤهلين لعمل أي شيئ منافي للاخلاق , اولا والله الخدمة عمرها ما كانت عيب وانا نفرح لما نشبح أي شاب يخدم احسن من دقيقة دقيقة جاي ماد وجهه في الشارع ويقولك عمي نبي جني وهو اكبر مني بعشرة سنين ,وأهو عل الاقل يطلع مصروف حشيشه ,لكن المشكلة والهم الاحرف انه الايفكو هذي تعتبر مواصلات عامة يعني بيركب فيها اي واحد الكبير والصغير , البنية والعزوز , الشاب والشيباني الولد وبوه , البنت وخوها وللأسف مافيش اي احترام داخلها وذلك لانه غالبية سواقين الايفكوات قمة في الانحطاط وانعدام الاخلاق, وانا الصراحة واحد من اصدقائي كان يخدم علي ايفكو لكن اعتزل السنة اللي فاتت الحمد لله لكن مش لداعي الاصابة لانه ماشاء الله يهني علي روحه , لكن خلاص قالي فديت منها يا تولي حيوان زيهم يا متقدرش تخدم .


الكرسي الاول

وقفت الايفكو وكالعادة انهلب علي اليمين اول مامديت ايدي , توقعت لما نركب نلقي الركاب مقلوبين فوق بعض لكن مشاء الله الباين كلهم قدم في الصنعة مقعمزين ثابتين ,ركبت وبسم الله شفت الكرسي اللي ورا السواق فاضي وكيف بنقعمز, البوليطاي( محصل التذاكر) غمزلي وهزلي راسه هديكة الهزة متاع نوض ,زمطت رياقتي ودرت روحي احول وقعمزت ,انا عارف من الاول الكرسي هذا مخصص لمني وعلاش البوليطاي عيونه قريب يطلعو وهو يفنص فبا لكن هكي صرصرة, الكرسي الاول خلف السواق دائما و خلينا نقولو في معظم الايفكوات مخصص للتلخبيط , يعني خليني نقولها صراحة الكرسي هذا مخصص للبنات بس , كرسي اللقني والهدرزة مع السواق والبوليطاي , لكن البنات المحترمات عمرهم ما يقعمزوغادي الحمد لله , بالليبي انكسرت فيهم لما انا قعمزت واستوليت علي الطربيقة( المصيدة) متاع البنات .

احذر اين تقعمز
وين تقعمزفي الايفكو ديما مشكلة فلو قعمزت بروحك ما تعرفش من ممكن يجي وينبت فييك و لو قعمزت مع اي حد الله اعلم شني بيصير فيك
- فلو بتقعمز جنب حد أول شي شوفله بيطانه كانهم عرق اقعد واقف خيرلك مش ناقصة الحكاية ياسر تشم في الصنة من بعيد,الحق انا مستغرب انه في مازال ناس مصدقة انه الدوش في العيد بس .

- كانه وراك سنونه اول ما شبحت للكرسي معناه بيفتحلك موضوع وينفخلك راسك , مرة قعمزت جنب واحد ساعة وهو بيموت ويعرف شني المسج اللي قاعد نكتب فيه, يحساب روحه هو بس يقدر يشقلب عين فوق وعين لوطا علي التليفون, حتي انا مشقلبله عين فوق نشبح فيه وهو مبلحص عينه, قريب قلتله هاك اكتب انت تو انمل عليك , وبعد ما كملت سألني السؤال الليبي المشهور اللي حيسأله اي واح اول ما يشوف تليفون

شني نوعه التليفون هذا يا شبيب
سامسونج
اما موديل
شني قصدك
قصدي شني اسمه
السلحوبة
شني
السلحوبة
ما نعرفاش
قاعد جديد كيف نازل
ترا نشوفه معليشي
رد بالك عليه

وهو يقلب فيه من برة سالني قداش كلف يا خوي

اكثر شي نكرهه لما واحد يسألني بقداش , مش عارف تقول قاسميين معاي , تجي بسورية جديدة اول شي يسألوه بقداش ولما تقوله علي السعر يقولك هلبة والله لقيت زيها مش عارف وين ارخص , ديما بيطلعوك انضحك عليك وخلاص

المهم هالحصلة قلتله تره معليش هات التليفون ورخيت شواربي وفنصت عيوني فهم بروحه وانصمت.

- لو ركبت جنب شباني خودلك من نفخ الدماغ شكاير شكاير , يبدي يشكيلك ويدويلك لين تحس روحك قريب تروح معاه تشد اولاده من عنقتهم و تطيح فيهم هبك عاللي مدايرينه في الحويج المسكين.

- كانا بنت مقعمزة بروحها اتدردح وما تخممش تقعمز خيرلك .

- ولو قعمزت في كرسي فاضي مش عارف من يجيك يلصق فيك انت وحظك
مرة كنت مقعمز في امان الله ملصق وجهي عالمرش نخمم ,جت تفحفح من بعيد تقول معطر جو باخة شيشتين صنة ولا اكثر لكن اهو علي الاقل غطت علي الصنانات والروائح الكريهة اللي عالقة في خشمي , جت لابسة نظرات مدرقين وجهها من نص جبهتها لشاربها الفوقي ولابسة شكارة خيشة علي اساس وشاح طبعا موضة الايام هذي تشرك اي حاجة وتلويها علي راسها, وخلاص ضاقت عليها الدنيا جت بتقعمز جنبي
تضايقت لاني كنت مفرشخ رجليا ومطبزع في الكرسي وواخد راحتي , زدت لصقت علي الروشن وتكرمشت وحسيت روحي تقول انا البنت مش هيا لانها هي واخدة راحتها علي الاخر والحمد لله الواحد طلع يخاف ربي, الحق خفت علي روحي يا شينيك حصلة وخلاص
المهم شورني زمطت 5 ليترات رياقة لين وصلت لمشواري يالطيف وخلاص الواحد قداش بيتحمل .

الاغاني المروكية
في ظاهرة غريبة موجودة عند كل الايفكوات الا وهي الاغاني المروكية ( المغربية) اول ما تركب تلقي المروكي يلعلع علي طول رقبته وشوف روحك عاد كان السواق جوه مليح يحطلك شريط مرسكاوي صح , توا باهي المرسكاوي اهو وفاهمينه ( نكره جيه كما يكره العطشان طاسة امية كما يكره الصقعان بطانية ...الخ الخ ) لكن المروكي شني قصته مع الايفكوات كيف يفهمو فيه مش عارف, مرة راكب معانا شوره جايب شريطه معاه مده للسواق وقاله حطه استغربت لما وافق السواق لكن لما طلع شريط مروكي عرفت ان السواق مقدرش يقاوم مسكين , و أصلا علاش المسجل اساسا تركب في الايفكو تقول طالع مزرد ناقص غير التدربيك و التصفيق بس .

شباب جوه مليح
اسؤا شي ممكن يصير انه يركبو مجموعة شباب و يبدو يتكلمو تقول مقعمزين في حوازة سبان وسفاهة طول الوقت , تفنص تعض شواربك تأشرلهم تقوللهم اسكتو شي ما فيش فايدة كلام يوقف الشعر طول الطريق , هذا مش في الايفكو بس بدي الواحد لما يمشي حتي بسيارته يسكر المرش ديما وخلاص لانه الشباب ماشاء الله معاش يتحشم ولا يستحي الدوة الفارغة والسبان عنده زي حروف الجر ما يقدرش يدوي من غيرهم, تي مش مفروض هذا اخلال بالادب العام والله مفروض اللي يسب في الشارع يشدوه , خلاص الواحد فد معاش تقدر تطلع حتي انت وبوك ولا عيلتك تخاف ترد علي واحد بالسيارة وانت ساهي يحطلك كلمة لين وجهك يجف , لأمس بس في وسط البلاد زوز يبصرو علي بعض و الدوة الخامرة كلها يقولو فيها عادي في الشارع قدام الناس والله حتي برة في اوروبا ما فيش هالسبان هذا كله في الشارع تي هذا شني , معاش فيه من يربي خلي العصا تربيهم توا .

الجامعة
من ثلاث او اربع سنوات فاتو كانت الايفكوات اللي ترفع للجامعة محترمة شوية علي بقية الايفكوات , لانه فيه ناس متعلمة ومحترمة هلبة لكن شني اللي صار معرفتش , ركبت الايفكو مروح من الجامعة لقيت الايفكو مستف زوز زوز, ولد وبنت , ولد وبنت , بالك اني غالط مشيت بنكلم السواق حتي هو يهدرز علي بنت , تي اني وين يا ناس , انت في الايفكو يا باشا انت في ملتقي الاحباب , تي والله حاجة تبكي هالتفاهة اللي حني قاعدين فيها


عدة احتمالات
لما تركب الايفكو هناك اربعة احتمالات

- يا اما المرور يوقف الايفكو ويشحطكم ومرات حتي ينزلكم , المرور راسهم وراس الايفكوات ومش عارف شني ذنب الراكب يتشحط يا افندي خوذ الاوراق وخلينا نتسقدو وتو يوليلك , لا شي انزلو كلهم هني , تي باهي احني بنتعطلو توا , ما دخليش من قالك تركب معاه , والله لولا البدلة ما كنت نحترمه هالمخلوق المتخلف شني هالمرور اللي عندنا لا احترام لا اسلوب .

- يا اما الايفكو يدير حادث يتراوح ما بين الطفيف والمميت , هذا كله من التزبيز والجري , تقول رافع ثلج خايف عيه يذوب , المهم زيادة في الاحتياط خلي وصية قبل ما تركب الايفكو .

- يا اما صاحب الايفكو يتعارك مع ايفكو ثانية وتلقي روحك تتفرج علي احسن فيلم هبك في حياتك , تو كل بلاد عنده اسلوب دفاع عن النفس كارتيه بالايدين وتيكواندو بالرجلين ومش عارف شني تاني لكن في ليبيا اسلوب الدفاع عن النفس اللي عندنا اسمه الفشخ ويكون عن طريق استعمال الهراوة او المرتكة او الدبوس سميها كيف ما تبي المهم طرف لوحة باهية وانزل بيها عليه لين يبخ دم , زي الحيوانات مفيش بصارة في العراك يا ميت يا في العناية .

- يا اما توصل للمكان اللي تبيه سليم وبالتالي فانت محظوظ هلبة ولازم تشكر سواق الايفكو وتبوسله علي راسه انه وصلك بسلام .


هي أنستو بعض

13 comments:

Anglo-Libyan said...

is it like a mini bus like they have in Egypt?

what an adventure just to get from A to B, sounds really awful!

Allah Ye3inkum, but the description is very funny, first class :o)

DaMoon said...

LOL Libyano very funny, sad but true.....lol I alwayz wanted to know what goes on in there, cuz da outside isn't very pleasent either, jari o d3ak, and elli yakhid fe elfloos mta3 elbwalees is da one having fun and throwing kisses at every freaking possible female, doesn't matter 7elwa shina, elmohim ntaya!!!!
3jab wallahi!

piccolina said...

OMG libyano loool i'm drying my tears to see the screen lool
that was super funny lol
i know all about what u said but u know mashallah u have a great way to the jokes ! u should listen to me when i tell a joke lol it becomes more like a story lool
bless you

P.S i believe some one will be jls now after that smelling gilr who sat beside u lool

Libyano said...

Anglo-libyan
it's much bigger than mini bus and much more fun especially there is no AC :D

Damoon
yea it's true they would go after any girl even she is so ugly lol
may be you should try a short ride one time , think of it as an adventure :P

Piccolina
Oskti sakit I was afraid she would call that time while I was sitting next to the girl ,I would sound so mi6la7'bi6 and I would confess 3ala 6ool lol , and you know when I told her she was like o 3lash ma nodtish min mkanik , maho mafeesh korsi fadi , bahi g3adit wagif m3ash t3awidha mara tanya bahi , she is not 7arfa by the way she is just jealous :D .

piccolina said...

loool she sounds like me and i can imagine that ;)
and yes m3ash t3awidha lool
men oh mennn

mani said...

MUHAHAHAHAHAHAHAHAHAHAHAAHAHAHAHAAHAHAHHAHAHAHA

WALLAHE YA LIBYANO SHARREKTENEE WALAHE LOLOLOLOLOLOLOLOLOL

SHENE HADA BAS LOLOLOLOL

Man I love the way you tell em walahe. You know, I found that this is the way we Libyans have adapted to our disasters; By joking abut it in funny ways and making it a laugh. of course, it's never a laugh when it happens and you were probably going nuts at the time we tshed fe sh3arrek LOLOLOLOL

Rabe yo7fdek ya wkhayye leena :)

Libyano said...

Piccolina,
we trust each other so much. You dont need to worry! The foundation of our relationship is trust and respect. Plus I could never compare any girl with her, she is simply amazing!

Khoi Mani
Sarcasm is the best way to express the negative things otherwise it would be complaining o nafakh ras
aslan Libyans mish fal7een 3'eer fil doa and am one of them :P yala aho el wa7id yrawa7 3an nafsah shwaya .
salam

piccolina said...

yes i do agree mashallah she is amazing and so u r !! i pray for GOD to bless both of u inshallah and inshallah you'll keep telling funny stories all the time :D coz you r sooo good in it lool

mani said...

Salam ya khoi ya Libyano,

Say, your Libyan bloggers page is not working, its asking me for a password.. i want one of these blogger icons u have :)

salam

lovelytripoli said...

المسلس هذا عشته بعد وفاة المرحوم
لدرجة قلت لامي بنمشي بسيارتي من غير رخصة
بس قصة الكرسي الي وراء السواق اول مره نعرفه
والصنانيين مانحكيلكش
مره صاحبتي قعمز جنبها افريقي ولا سوداني صنته فاحت وهي عندها حساسيه زيني
تي طلعت الصنه وقعدت تبخ فيها ف الافيكوا عيني عينك واحني البنات ميتين بالضحك ولا هو يشوفلها باحتقار اني حايرة كيف مايدزخش حني هو

وبالنسبة للصناين راهو حتي في قطارات لندن و باصاتهم ضروري تشملك ريحه
تهبل كل حواسك كان ماتقتلهمش

MaySoon said...

Libyano, what a funny description but sad to say it's true...I couldn’t find a better description than “qmet el en76a6 wa qelet el adab” to describe MOST of evekwat drivers, they see people as 1/4 or 7'mseen garsh not as people.. and if a lady is driving by them they'll do whatever it takes to annoy her... starting with the typical way of "eksr-3leha" crap..

Libyano said...

Piccolina
thank you, always glad to see you here

Mani
I am making some changes on the blog so inshallah it'll be back soon , cool changes you have on your blog by the way ;)

lovely tripoli
allah ykoon fi 3onik
lol at tthe smelly guy wlalhi elnas m3ash tit7ashim taoa hoa ili santah zai el jeefa o yog3od yfans feek 3lash mish gadir tit7amil snanatah elmafrood kol wa7id yebi yarkib ya36oh ba7'a bil 6obo bahs yarkib ndeef :P

Maysoon
wama khafeya kan a3dam
sometimes I feel they should really consider this law of not giving license for those below 30 but again some people will stay without jobs and they are the ones providing their families .
we need a btter education system cos all we see now is generations of seeya3 and kilat al adab

Anonymous said...

أسلوب هابط للأسف ....