16.2.07

الطابور


امس فى الليل جانى كابوس نوضنى من النوم , حلمت انى واقف فى طابور و الطابور هذا مستقيم و مافيش حد يقص ولا ينقز لغاية ما وصل فيا الدور نوضت مخلوع , تعوذت من الشيطان لقيت روحى فى السرير ففرحت الحمد لله , معقول فى ليبيا وطابور مستقيم أعوذ بالله من الشيطان الرجيم .
انا ما فيش مرة ولو مرة واحدة وقفت فى اى طابورفيه أكثر من ثلاثة أشخاص فى ليبيا إلا وصارت فيه مشكلة ضرورى ما يجى واحد يقص و يلخبط الدنيا كلها , هذا لو فيه طابور اصلا لان الغالبية عبارة عن كدس من الناس , هذا النظام الجديد اللى حنى اخترعناه , تكدسو والصحيح فى الجسم او الوجه يتسقد فى الاول , خلي نعطيكم بعض الامثلة .

فى السوبر ماركت واقفين عادى فى الطابور جى واحد شاد باكو حليب قص قدامى ومد الفلوس , نفخت نفخة لين حسيت النار بتطلع من خشمى و فنصت فيه شبحلى ومش عاجبه اللى صاير , قلتله غير استأذن راهو بنادمية اللى قدامك , حتى صاحب المحل معجبتاش دوتي , قال : معليشى عنده باكو حليب واحد بس , قلتله كانا غير يستأذن نخلصهوله حتى انى الباكو , علاش معندناش احترام ,مش عارف علاش .

فى أى مقهى نطلب اى حاجة , زوز طابونة ,بيتسا,نص بالدحى اى حاجة المهم نقعد نستنى ويجى واحد بعدى وياخد نفس الحاجة اللي طلبتها قبلى, علاش عندنا الواسطة فى كل شئ, مش عارف علاش.
و مرة في مطعم الكباب متاع راس حسن واقفين فى الطابور زى الناس واحد لابيه لا عليه نادى ولده الصغير و قاله هاك الفلوس وبرا قص القدام فى الطابور وخود 6 كباب , توا مش الواحد يمزطله راسه على الحيط هذا ولا شنى, يعلم فى الولد القصان من توا بكري بكري باش ما يحصلش حصلته هوا توا .

فى الجوازات فى المطار انت واقف فى الطابور ستين واحد يقص قدامك ويحساب روحه دار حاجة كبيرة لما يختم الجواز قبل الناس , انا ديما نختم اخر .واحد وننزل نلقى شنطتي تستنى فيا واللى قصو كلهم قاعدين يستنو , علاش حنى فالحين فى التفشيك على بعض, مش عارف علاش .

فى أى جنازة انت واقف وتضرب فيك الشمس وتبى تعزي وتحصل الاجر تلقى ناس جاية باش بتورى وجهها وخلاص يتداعكو وينقزو فى نص الطابور, علاش تعب فى روحك يا بنادم مش عارف علاش.

فى الطريق لما تصيير زحمة تلقى السيارات قريب تركب فوق بعضها كل واحد يبي يوصل الاول والقصان على مفاصله من اليمين واليسار, الناس شايطة فيها النار , مش عارف علاش .

في الشيل ( محطة البنزين) انت واقف فى طابور السيارات يجى واحد بقمة الوقاحة والبرادة وصحة الوجه يجي بسيارته من قدام ويوخرها للماكينة , انا مرة حضرت عركة فى الشيل على خاطر القصان هذا , متاع الشيل قال للراجل حول سيارتك برا شد الطابور . الراجل سكر راسه يبى يعبى, متاع الشيل سخن و قاله تى والله ما تحولهاش الا لما نصب عليها بنزينة , ونتشلك فيها النار هنى, أحلى حاجة فى ليبيا تصكير الراس مش عارف علاش.

البنات والنساويين مرة مرة يفلفزولى فى رقبتي حتي هما ,تجي تقص قدام الطابور ببرودة وعادي وتاخد حاجتها قبل الكل من غير إحم ولا تستور تقول فايتة على صفة لوح مش ناس واقفة تستني , يأنسة يا أبلة يا أخت يا أمى يا هووه غير علاش القصان بس , مش عارف علاش .

خاطرى نعرف شني مشكلتنا مع الطابور ,علاش مفيش صبر , علاش الاستعجال , الكل يفكر غير نسقد روحى بس و طز فى الباقى.
ستالين ولا مش عارف منى زمان لما شد روسيا كان مداير قناصين فى اماكن الطوابير و اى واحد غير يمد زومته بس ( يطلع وجهه) من الطابور يصلفقوه برصاصة فى جبهته على طول , ياريت تطبق الفكره هذى هنى باش الليبيين كلهم تبدا جبهتهم منقوبة والواحد يوقف في طابور زي الناس .

يلا, شكلى توا بنمشي نشد طابور باش نمحي اثار الكابوس اللى شفته ونولي للواقع .

10 comments:

AngloLibyan said...

it was strange to see Libyan Arabic on toot!
you know 3 years ago, my wife and kids were going to Libya on holiday (from London) I had booked them on the Libyan airline flight, when we got there, there was so many Libyan people waiting, it was Heathrow airport and people of all nationalities were queuing at their desks exept Libyans! how embarassing, it was disgusting suddenly about 100-150 Libyan men just piled in front of the check in Deskpushing & shoving, I am a bit short so I could not get anywhere then I saw an English woman in the middle of the crowd, she was almost in tears, she said she was married to Libyan and was only trying to check in her children to go on holiday, I started shouting to people to behave and have some respect for the woman, many of them told to ***** off and go away if I dont like it, there were women in tears men shouting so uncivilised, then guess what, Libyan airlines got the airport security to sort it out and force these men to queue, it took 2 hours to this point, i was way back in the queue and thinking it would take me hours to check in, i got to the front after about 10 minuts, I swear! do you know why? most of these stupid men crowding pushing and shoving did not even have reservations and were told to leave the queue thats why I got there so qick, it really was something that would shame anyone who is Libyan.
my family dd ot travel with Libyan airlines again.

Libyano said...

anglolibyan it seems like you missed a lot of the fun we have here in Libya , what you saw in the airport that day goes on daily basis here , but it's true the fact the only messed up line is the libyan airline's one makes you feel ashamed .
the airport here is a mess , everything is possible , you don't have reservation and you get on the plane and the one who has gets kicked out and it's not in the libyan airlines only .

my advice to you try to go Omra in ramadan in the Libyan airlines , you will feel like you are in a zoo and the airplane is worse than a bus in the rush hour , I can swear if the can get away with it they will allow people take the trip standing in the airplane , and the fights in the lines makes you wonder if these people are going to Omra or what , sometimes you cant feel your feet touching the ground and you move with the crowd .
we need the forehead shoot plan for sure .

piccolina said...

looool you made laugh so hard then i was like OPS i'm laughing at my people " libyans " as if i'm from sweden !DUH
ok libyano you are in heaven coz you are dealing with men's taboor , don't let me start about the WOMEN's mmmm it's not even taboor
honestly i stand with men lol coz they respect women lol " you know in what way , like showing each others that they r Gentlemen and i use that !".... don't give me that look !!coz i'll never get what i wants if i stood in women taboor!!!!!!!!!!

MaySoon said...

يعطيك الصحة يا ليبيانو لأنك جبت سيرة الطوابير.. والمشكلة لما تتكلم تطلع غالط ولما توقف في الطابور يعطوك شبحات تقول عليك جاي من كوكب تاني وممكن بينهم وبين نفسهم يقولوا شن هالغبية اللي تحساب روحها وين, واقفة في طابور!!! حالة وخلاص...

مشكلة الليبين والطوابير هي بشكل عام مشكلة نظام.. يعني مافيش نظام والطوابير عبارة عن مثال!

Libyano said...

So piccolina you mean if I wear wisha7 and get into the men's taboor I'll get what I want first , I'll try that :P .
ميسون
متعدليش علي الناس , لما الواحد يشوف ناس محترمة ومنظمة اكيد حيحس روحه زى الحيوان الهمجي لما يداعك

Lebeeya said...

I loved your post :) yes, a taboor in libya is A BATTLE! Death to the people that cut lines!

*Lebeeya slices off Libyano's arm*

lovelytripoli said...

طريقتك في طرح الموضوع ضحكتني ..للأسف ياأخي بدي كل من يحترم القانون أو يحترم الآداب العامه و يحترم آداب الطريق شاذ لأنه زي ماقلت نازل من كوكب ثاني

والغلط يإما فينا لأننا تربينا بطريقة نموذجية صعبت علينا تأقلمنا مع هالمغول الفوضويين

إيه يالبيانو لو تشوف زحام طوابير المصرف توا إنته لوده تتخرج من الطب و تبدي تخدم و تبدي توقف في طوابير المصرف ...وتشوف نماذج مختلفة و بجديات مش تحرقلك دمك ممكن تجلطك في مكانك


أني زمانات كنت في مصرف الجماهيرية باب بنغشير بوي الله يرحمه فتحلي حساب اول ما اشتغلت غادي لان فيه امي واختي الكبيرة- طبعا المصرف يلم ناس محترمة وناس ...!!؟, وطبعا بتقول اهو نعطي دوري لعزيزة كبيرة تلقي وراها 20 وحده كل وحده اتقولك معليشي يابنيتي و لو بتسقدهم كلهم يفوت عليك الدوام
ولو قلت نجي غدوه تلقي نفس القصة...

وفي الأخير عالجت مشكلة المصرف بنقل حسابي لمصرف الجامعة...عالأقل طابورهم صغير ولو انهم مايحترموش فينا السيدات احني والرجالة من نفس الصرافه وشوف جوك عاد علي قولتك تجي بنت تقول بوها اشبح منو و تسحب ولا كأن في 10 رجالة قدامها او كم بنت و لا كلهم عندهم أشغال والأحلي وقت تطلع تلقي هديكا البنت الي مسكينة مستعجلة واقفة تهدرز مع صحباتها وتضحك وتقول ضحكت عليهم مش نسقد روحي بكري بكري



حتي الصغار مستحيل يعملوهم أماليهم النظام واحترام الاخرين ايح مالا كان تشوف طوابير الصغار و اماليهم في عيد الطفل علي الادارة كل واحد يدف الثاني و يجبد اتقول ميتين بالفقر ماعندهمش العاب لصغارهم و الي يقهرك كلهم متعلمين و في منهم دكاترة جامعة و اساتده...طبعا ماهي روضة الجامعة


وخلينا من هكي طابور السوبر ماركت خليها بروحها كان ماتوقفش وتفرد عضلاتك فيه ماتلقاش مكان اصلا توقف فيه هو قريب الوقفة في طابور التخليص ندفعوا عليها فلوس..

استني شوية طابور السيمافروا خليه بروحه اني ليا قريب 8 شهور نسوق بس كل يوم نروح بقصة لأمي هذا شنو والله لو بتحترم القانون و تمشي بالشوية اطيح بين ايدين شاب متهور او راجل طالع من عركة مع مرته وراسه ساخن فيقولك حشاكم "ياحماره" ولا يحترم آنسة ولا مدام...ولا تسبقك مدام وحشاكم تدفل عليك بس لأنك ماطلعتش زي الصاروخ وقت الضي تحول بسرعة لأحمر...!!

إيه...طابور المطار و الشناطي خليه بروحه هذكا كارته كبرا....كله كوم وقت روحت اني وامي من لندن السنة الي فاتت والله لا يعرفوا يحترموا مرا كبيرة ولا شيء تلقاهم يدفوا وجري ليه ليه...وفي الأخير علي قولتك بتلقي شنطك قاعده ما نزلتش حتي من الطيارة...!!؟

طابور الشناطي علي رأي المصريين يالهويييييييييييييييييتتتتتتتتتتتتي

والله نبدأ نبرطم بيني وبين نفسي عالفوضي وعالإهمال و الحشايم..


طابور تجديد الجوازات والله من شهر صارلي اني وخوي موقف من الضحك معادش قدرت اني وخوي نتحملوا

طبعا خوي واقف بيدفع لتجديد جواز سفري اني وامي ففي واحد واقف جنبه يمد في وجهه من يمين خوي للشباك متع الدفع...خوي يشوفله و يعاود واني نضحك المشكلة ان الراجل ضعيفون عالأخر وخوي طويل وعريض يعني لو بيغطي الشباك والله ماهو زارق منها هدا...وهدكا الارجل مصر يمد في وجهه كل مالشرطي يكلم في خوي...في الأخير قاله خوي تعالي اوقف مكاني وادفع انته فقاله اسف معليشي سامحني مش قصدي ..ههه وصلت الحكاية في دفع الفلوس 60دينار هههههههههه
ولا بعد علينا وقعد يشوفلنا وكأننا ديناصورين منقرضين من العصر الحجري


بس تعرف شن يقتلني وقت هالانسان الغير منظم والهمجي والفوضوي يسافر برا لتونس أو مصر تعالي شوفه كيف يتغير و يبدأ انسان غير ومنظم ومحترم ترا علاش
لأن تلقي في تونس و مصر قانون يخليه يمشي في طابور مستقيم وإلا ياكل علي راسه ...

مش ينضرب براصاصه...



تحياتي

Libyano said...

lovely tripoli
أولا خلى ناخد نفس بعد التعليق الطويل والشيق هذا
أولا انا الامثلة اللى كتبتها جزء بسيط جدا جدا من الصراع اليومي فى الطوابير


انا عندي تجربة في مصرف الجماهيرية باب بنغشير والصراحة زي ما حكيت بالظبط معبي عزايز و اللي يضحك مش كيف كلهم يقصو قدامك لكن كيف كل عزوز جايبة معاها الختم الخاص بيها .

بالنسنة لروضة الجامعة انا خديت درس فى طب المجتمع السنة الماضية في الروضة ونتذكر اني خديت فصل السنافر كالفصل اللي كشفت عليه , مش عارف لو شفتك غادي ولا لا.

بالنسبة للطوابير خلي ديما راسك مرفوع وعيونك مفنصات وايديك مجنحات باش ما حدش يفكر انه يقص , ولو حصل وقص سمعيه وسخ ودانه

lovelytripoli said...

هو موضوع الناس الي ماعندهم صبر في طوابير السيارات شكلي بنندرج تحت قائمتهم من كتر مانعاني من زحام الجامعة تلقاني شاده الكلاكس بشكل احيانا مزعج لأان تلقي واحد ينقز قدامك من غير لا عفوا ولا فليتشه ولا احترام فبديت ننفخلهم في راسهم بكلاكس السيارة ...

لبيانو ماقتليش شن إسم البنت أو الولد الي درتلهم الاستبيان متع طلبة الطب؟

يعني مالفتتلكش نظرك أبلة طويلة و تلبس في نظارات طبيات في نفس الحجرة الكبيرة الي تجمعكم فيها دكتورتكم
لدرجة الطلبة يجوها و يقولوها يادكتورة ...كيف نديروا هذا ...!!.؟

Anonymous said...

this post is absolutly hilarious! wallahi you reminded of zaman el tawabeer,the 80s, you are too young and you don't know what it looked like...we used to queue fi tawbeer el jam3yat and the aswaq, for cheese, butter, shoes, socks,onions,kleenex, we enta we 7adek!wel wasta! sometimes you had to buy a useless thing with the thing u needed, you could end up with a pair of shoes ur size and the other one size 48(ta3tiha linashnoush) wallahi twabirkoum tawa janna!