24.9.07

عودة

السلام عليكم

أولا ولو انها متأخرة لكن كل سنة وانتو طيبين بمناسبة رمضان وانشاء الله ربي يتقبل صيامكم

شكرا لكل من حط تعليق او سأل عني وسامحوني علي التأخير في الاجابة لكن انشاء الله خلاص الايام هذي مكسد وإنشاء الله حنكتب علي بعض اليوميات الكويسة منها واللي تدره الكبد .

انا مش عارف امتي اخر مرة خشيت علي النت وشفت اي حاجة ثانية غير الإيميل يعني علي أساس مش فاضي و وقتي معبي ,انا صح كنت مشغول الفترة الماضية بامورمنزلية و دراسية والحمد الله كل شي تمام توا , خلاص كملت الدراسة وبديت في سنة الامتياز يعني وليت دكتور بس مازال من غير شهادة لكن اهو علي الاقل خششت راسي في معمعة المستشفيات وانشاء الله هالسنة تمر علي خير.

نسيت نقول مبروك لكل مشتركي LTT وأخيرا الADSL صار ب 20 دينار شهريا مع حصة 7 GB لكن يا فرحة ما تمت اي نعم الانترنت رخص لكن الخبزة سعرها ارتفع مش عارف كيف وامتي لكن صاحب الكوشة من ايام فاتو فنص فيا لما مديتله ربع وانا واخد 10 فردات قالي نحي زوز توا الثمانية بربع
امتي صار يا عمو
توا
شني هني بس
لا في كل مكان
شني السبب
الدقيق ناقص
وبعدين
فنص فيا وعرفت شني يقول في خاطره ( خود ولا خلي تره بلا تدريه كبد)
زمطت رياقتي و طلعت وانا نتمتم ( نحي من اللحية وحط في الشارب(
الباين اللي بنوفره من الانترنت بنحطه في الخبزة وخلاص وزي ما انتو عارفين حني الليبيين شعب خبزاوي يعني كل شي ناكلو فيه بالخبزة من نفاص الطن لطبيخة الفاصوليا بالكرشة وفيه ناس اي شي لازم ما تاكله بالخبزة كمثال زمان قري معاي واحد في المدرسة جايب سندوتش فسطه عصيدة ورب وعندي صديق ياكل في سندوتشات بالموز يعني فردة خبزة وفسطها موزة ولا موزتين , وصدقوني عمركم ما حتشوفو زحمة علي الكوشة زي ما عندنا الناس غير يسمعو الدقيق ناقص كلهم تجيهم النية في الخبزة ويبدو قريب يتقاتلو عليها , زمان وانا صغير لحقت شوية علي ازمة الكوش لما كانت بالطابور ( قصدي كمشة ناس والصحيح ياخد) وللأسف المنظر هذا بعد ما اختفي لفترة طويلة لكن السنة هذي الزحمة زي زمان واحرف .

الحمد لله علي كل حال وزي ما تقول جدتي انشاء الله هذا حد السو

9 comments:

mad said...

والله لك وحشه يالبيانو انستنا والف مبروك على النجاح وعقبال الدرسات العليا يا رب

dusk till dawn said...

salam Libyano
hows nice to see u back sparking ,well done in ur hard work.wish you success .at last u came out of ur cave ha ha

A.Adam said...

فكرتني بسندويشات .. خبرة باللوسة
اهلا بك من جديد

Gheriani said...

Congrat, Alef Mabrouk and Ramadan Kareem.

Anglo-Libyan said...

Ramadan Mubarak ya libyano to you and the family.

good luck with the sandwitches :o)

a_akak said...

3amoo libyanooooo !!!! you still alive :P

Its good to have you back my brother and hope things are going well for you and mabrook for finishing your med school (excluding imteeaz) and I have a few friends who have also just started there imteeaz :)

Its good to see the internet prices going down in Libya as i think 20LD is reasonable (but not for those whose salaries are 150 LD)

Bread, Man where have you been living!!!!!!!!! even i know bread has gone up and from i remember this was from last year (unless the koosha close to me was over priced)

Good to have u back & Ramadan Mubarik to you and your family and may allah accpet our fasting and rewards us for our good deeds

Fe Aman Allah

Safia speaks said...

Nice to see you´ve ended the hibernation!

Ramadan kareem!

Libyano said...

mad
الله يأنسك ويبارك فيك مشكور علي الحضور الدائم

Dusk till dawn
thank you so much and same to you I wish you all the best :)
actually I look like a cave man my beard is long and I haven't cut my heard for a long time but I don't stink cos I still take showers regularly

A.Adam
نص بالهريسة وطماطم الحكة اه ياحسرة علي ايام زمان

Gheriani
thank you :D

Anglo-Libyan
nice to see you again :)
inshallah when I hear of a new weired sandwich I'll let you know

Akak
3amoo mara wa7da
bahi bahi thank you and I wish you the best as well

You know what is weired the internet price is fixed in the internet cafes one dianr an hour so people who cant afford the adsl are actually using the internet cafes which means they are already paying much more than the adsl users

I didn't know bread prices went up last year may be it's only your koosha

isnhallah rabi yatakabal mina jamee3an

Safia
Now watch out cos the beast is awake :)

Hibo said...

حمد الله علي سلامتك من الخيم المكيفه متع الطب
ومن زحمه الطبي وزحمة الكوش
ورمضانك مبروك يامش دكتور


وه مابعدكم من وقت مروحاتي من لندن واني نشوففي هالخيم قدام الطب يعني من شهر 7 وعندي بنت ولد خالتي تقريبا زيك هدا بس وين كملت وشبه ارتاحت ولت تشابه للتل
غير ماوليتش خيط لانه حالك باهي


ولا طلعوا كورات عيونك من سهر الليالي والقراية لوووول


المهم قصدك ماسمعتش الحكاية ومافيها ان مش الدقيق ناقص الحكاية انهم زادونا فوق مرتابتنا 135 دينار يعني مثلا اني تعيين ودرجة 8 كنت ناخد في 213 دينار بعد ال135 وليت 348 دينار
وهما سمعوا بالزيادة الي كان بدينار ولا ب1 و75 قرش
يعني غير تقول هالفلوس الي زادوهملنا مش حايمشوا نصف تنك في البنزينه ولا في الكهرباء ولا في كروت الموبايل "لبيانا" ولا ولا ولا

تي هي حتي الميه متع النهر بدوا يبعتوا للناس في فواتير السنوات الي فاتته يعني وتي روحك باش تستلم الفاتورة لووووووووول


ياودي غير ولي دكتور رسمي وتوا تحس بالزيادة والنقصان

انته وسع بالك واطلع لوده في البلاد من الساعة 12 باش تنسي الكساد في طوابير زحمة السيارات متع الشوارع
الي في الشك تتحرك
ياسااااااااااتررررررررر

ولو بتطلع علي رجليك مدابيك تلبس قنبالي للركبه باش تتجنب اصابات الطيحات في حفر المرشبيدي


هي تحياتيييييييييي