19.7.08

قالك بحر

لان الجو صيف والدنيا بتولع فيها النار فمن الطبيعي ان الناس كلها تمشي للبحر يوم الجمعة واني زيني زي الناس ماشي بنقع روحي شوية في المية المالحة ونشوي سبولات وناكل دلاعة اني واصحابي , كان موعدنا بعد العصر وبما اننا شعب متاع مواعيد ما تلاقيناش لغاية الساعة 6 ونص ويلا علي تاجوراء كان واحد من الاصحاب سبقنا وحصل مكان كويس واول ما وصلنا واحنا واقفين جنب السيارات جي عيل صغير يبكي جنبنا , تلفتنا يمين ويسار لقينا الدنيا كلها لاهية في روحها

شني ياعمو خيرك

اهي اهي....... نبي ماما

باهي وين ماما

غادي

وين غادي

غادي

باهي تعالي , شفنا الناس اللي قريبين منا لكن مالقيناش امه, الولد قال احنا كنا في مصيف

باهي اما مصيف

مش عارف

قداش عمرك انت

ستة

شن اسمك

اسمي معاذ

ركبنا السيارة ومشينا لاقرب مصيف ومن مصييف لمصييف ومافيش حد عنده حد رايح وللاسف ما فيش غير كمشة حيوانات في كل مصيف تسأله يقولك برا خش دور بروحك

باهي مش هذا المصيف انت مسؤول عليه

ما لياش علاقة كل واحد مسؤول علي صغاره

ظلمت الدنيا ومازال ما لقينا حد مع الساعة 9 واحد قللنا فيه عيلة كانت تدور علي ولد رايح قبل شوية مشينا للمصيف اللي قاللنا عليه واخيرا لقينا عيلة معاذ واعطيناه لامه بعد ما اعطيناهم درس اي هزبناهم الواحد ما يعرفش يحافظ علي صغاره معاش يطلعهم معقولة ما تندروش بيه رايح الا بعد 3 ساعات وكان طلع غارق ولا ميت

ولينا لمكانا والنية طايرة من البحر والماكلة خلاص لمينا بضاعتنا ومشينا قعمزنا في حوش واحد من الاصحاب

خلاص كرهت البحر

وزحمة البحر

وفوضى البحر

والصياعة اللي في البحر

امتي بنولو ناس بس

12 comments:

A.Adam said...

heeeh; تاجوراء شنو بس
دار تليل حيث الشاطئ الجميل والهواء العليل :P

BTW thanks for your call:) even wasn't you but you made my day :D
sorry I forgot to call you back at the end of my day

nasimlibya said...

امممم شن بنقول بس اللي مش قادر يتحمل مسؤولية اطفاله مش ضروري يطلعهم بعدين وين ل قاعد بيهم لليل هدو اطفال
الاشكالية بدت ان الاهل معاش قادريين يربو مش الكل بس الاغلبية بدت هكي
وبالنسبة لستفسارك امتي بنولو ناس بس لما ميكونش في بحر !!!!!!!!!!!!
:(
هناك العديد من التصرفات التي تطفو علي السطح بمجرداقتراب فصل الصيف من المؤسف طبعا

LoveLyH said...

توا مش تقولي ماعندكش جواجي
ياودي بحر في ليبيا صعب
اسمع لما تبي تمشي مره ثانية للبحر امشي انته وصاحبك بعيد عن الناس
باش لا تلقي عيل رايح لا تلقي كنايس مبزعه و مكدسه فوق بعضها

امبكري خديت امي في طريق القاعده قلت لامي خيرهم هكي الليبين الشط كله وسخ وحاله شكاير الكناسة مرميه فوق المرشبيدي ياريتهم حتي رابطينها ف شكارة كناسة لا ملوحين

ومش في البحر بس حتي في البلاد
بعدين اني نعرف الي يجيب صغار ويكبرهم ويربيهم يفتح عيونه عليهم و كان حتي يربطهم بحبل او سبته زي الاجانب
مش لا يغرق في بحر ولا يطيح ف حفرة


ولا نقولك تي حرام الي يتزوج يقعد من غير صغار خيرله توا الدنيا بتولي كل شيء بالفلوس بالك حتي الاكسجين يبوا يصمصروا فيه

CrowdedMind said...

salam
باهي يا Jwaji مشيت للبحر وغيرت جوك
طيب فيك

صارتلنا مرة حني بس كانت بنت من مصر تكعبشت في رقبة ماما تقول جايبتها وناسيتها
ولا بت تخلي خوي ياخدها ويدور علي
عيلتها سكرت راسها
انا عاوزا خالتي
خش علي الخط بابا يبي يحاول يقنعها انا يمشي هو وياها ويدورو عيلتها وحطاتا حتا هوا في القايمة السوداء

قعدت عندنا من الصبح للعصر وامن المصيف كل ميبو يجو ياخدوها تقلبها صياحات ومش اي صياحات انت اكيد سامعهم صياحاتهم
يالاهوي ياخالتي متخليهمش ياخدوني
قعدو كل ميلقو عيلة يدورو في بنت
يجيبوهم للشالي متاعنا وحي عليك وحي كيف نبو نطلعوها باش تشوف الناس الي جايين يشوفها بنتهم ولا لا تقعد البنت تقول جايتها epilepsy
وحني خلاص نبو نروحو ولازم نسلموها لي
امن المصيف ستر ربي خوتها جو
طلعت نفس قصة معاذ ماشيا علي رجليها من مصيف لي مصيف وهيا عمرها 7 سنين بس

تخيل جونا حاجة 7 شباب
يبو يخشو يضربوها وبدي فيها الحزان وطبعا هيا وين قاعدا في رقبة ماما ياخالتي ياخالتي


ولما ماما قاتلهم عيب البنت راعشا
قالولها ياطنط دي وقفت قلبنا كنا فكرينها ماتت

يلا طولت عليك
في امان الله

Amira said...

Aww don't let one little incident ruin your jwaji and going to the beach!! Can't you try and avoid the friday rush?!
:-P

Fe Aman Allah

WEDA said...

ديما هكي لما تخطط وخاطرك يقعد الجو سمح يجي حد يقلقك ويطير نيتك ...ام ع العيال فهذا جو الامهات الجاهلات اللي ياخذو فيهن يضنن ويرمن في الشارع لابو لام.. وبعدها يقولك العيل غرق والعيل مات ويبكو عليه..كان يبوه راهم ربوه مش طالقينهم هكي ... ام ع البحر تعال مشرق وشوف البحر السمح(مش بنغازي) لكن فيه مكانات تشرح الصدر وتنسيك الهم والدنيا بما فيها

Anonymous said...

Thanks God ! There are still people like u and ur friends !
lost children is part of going-to-the-beach-in-libya-program ! but without people like u people will think twice befor going !

keep on the goof work doc !

Libyano said...

a.adam
دار تليل ماتمشيش معا الشلافطية زيي اني

سامحني غلطت وكلمتك مرتين مش عارف شني صارلي ,انا شكيت ان يومك مشي زي الزفت لما مكلمتنيش في الليل لكن علي العموم حطيت اسم تاني من غير رقم في اول القائمة يعني ما تتوقعش مني اتصال الا بعد 5 سنين تانيات علي الاقل

NasimLibya
يقول المثل الليبي الشهير
في الصيف كول المصقع والبس المرقع

hibbo
انستي ليبيا
ليبيين +بحر= كناسة
تخلف+ زواج= ستيكة فروخ

انشاء الله هذا حد السو

Crowded Mind
كانها راحت في مصر راهو خطفوها وحطوها تدور تشحت في الشوارع
مازال فيه ناس باهية في ليبيا زيكم الحمد لله

Amira
inshallah next time won't be Friday but still libyans are everywhere everyday ,feels like no one is working the beach is full in workdays even late at night :S

weda
حاولت مرة نمشي مشرق وصارت فيا بهدلة لكن حنعاود نمشي غادي مرة تانية انشاء الله وزي ما قلتي لما تخطط لشي ما يمشيش لكن اللي يجي في وقته يكون احسن من الف تخطيط

Anyonymous
I feel like a hero now thanx to you but I believe if I didn't do it there are so many people who will do the same :)

abdullah SH said...

بالله ما ادكرنيش بالبحر ما مشيتش ولا مره السنه هادى وامتى ما طلعت بس تغيرت جو الجمعه اللى فاتت مع صاحبى الساعه 12 فى الليل ريحت تليفونى بحدا سيدى بن دلسى بس ستر ربى رجعت ولقيته مدفون بالقزه ... قالك بحر قال ... حتى براوس يشكرو فيه فى هالنو هذا

هيثم said...

هل من الممكن أن نمنح انفسنا الحق في نعت البشر بالحيوانات؟

منير said...

"ركبنا السيارة ومشينا لاقرب مصيف ومن مصييف لمصييف ومافيش حد عنده حد رايح وللاسف ما فيش غير كمشة حيوانات في كل مصيف تسأله يقولك برا خش دور بروحك"

لم أكن أتوقع أن يخرج كلام مثل هذا من مدون وعلى الشبكة العنكبوتية وعلى مرأى الجميع البتة.

ليبيانو، من حقك أن تدون وتكتب على آهاتك ومعاناتك كما دونت سابقاً وأفراحك وكل ما يخالجك ولكن الإحترام سيد الجميع وبالأخص أنك تكتب كمدون وتكتب على أناس هم مسلمون قبل كل شيء وليبييون مثلك!

هل لك بالتفكير قليلاً حول كلمة حيوانات التى أسلفتها في تدوينتك يا سيد ليبيانو؟

هل لك بأن تتخيل أنك مخطئ في حق أحدهم أو مقصر فقط في حق أحدهم ونعتك أحدهم لا تعرفه لا من قريب ولا من بعيد بالحيوان ..

ماذا ستكون ردك فعلك حينها؟

لم أستطع إنهاء التدوينة بعد قرائتي للمقتبس أعلاه!

إحترامي للجميع

منير said...

"ركبنا السيارة ومشينا لاقرب مصيف ومن مصييف لمصييف ومافيش حد عنده حد رايح وللاسف ما فيش غير كمشة حيوانات في كل مصيف تسأله يقولك برا خش دور بروحك"

لم أكن أتوقع أن يخرج كلام مثل هذا من مدون وعلى الشبكة العنكبوتية وعلى مرأى الجميع البتة.

ليبيانو، من حقك أن تدون وتكتب على آهاتك ومعاناتك كما دونت سابقاً وأفراحك وكل ما يخالجك ولكن الإحترام سيد الجميع وبالأخص أنك تكتب كمدون وتكتب على أناس هم مسلمون قبل كل شيء وليبييون مثلك!

هل لك بالتفكير قليلاً حول كلمة حيوانات التى أسلفتها في تدوينتك يا سيد ليبيانو؟

هل لك بأن تتخيل أنك مخطئ في حق أحدهم أو مقصر فقط في حق أحدهم ونعتك أحدهم لا تعرفه لا من قريب ولا من بعيد بالحيوان ..

ماذا ستكون ردك فعلك حينها؟

لم أستطع إنهاء التدوينة بعد قرائتي للمقتبس أعلاه!

إحترامي للجميع