because it's so difficult to describe it in English and even harder to understand it for non Libyans I decided to write abut this thing happened to me the other day in Libyan.
كنت مروح من صلاة الظهر لقيت زحمة فى الشارع , مجموعة ملتمين على واحد و مجموعة اكبر تتفرج عليهم , وزى أى ليبي فإن أى مشكلة فى شارعنا لابد ما نحشي خشمى فيها ونعرف شنى صاير , وصلت لنص الزحمة لقيت اولاد شارعنا شادين واح عبيد الباين انه مش ليبى .
غير صلو على النبى يا جماعة الخير شني فيه
خانب , قال واحد بصوت عالى يلعلع
الشباب كان ناقصهم غير التكبير بعد ما سمعو كلمة خانب وبدو فى الخانب تعنفيق و كل واحد يشح فيه من جيهة , انحزت فى الاخير لكن صاحبنا الخانب مسكين معاش تعرف وجهه من قفاه, ركبوه فى سيارة وطارو بيه لمركز الشرطة , طبعا فى ليبيا الشعب فى خدمة الشرطة انت اللى تشد الخانب و انت اللى ترفعهوهم للمركز وناقص غير يقولولك احبسه فى حوشكم , المهم مش هادا موضوعنا , بعد محاورات مع الشباب عرفت شني المشكلة و عرفت صاحب المحل اللى خنب منه صاحبنا الخانب المسكين , لكن المشكلة هدا محل نظارات يعنى اكيد خنب منه فلوس , هدرزت على صاحب المحل نبى نعرف شنى صار , صاحبنا خنب نظارة . خلاص ضاقت عليه الدنيا معاش لقي شني يخنب غير نظارة لا وشنى نظارة طبية زيادة مش شمسية , انا على طول تذكرت المثل الليبى اللي يقول عمية وشدت خانب , لكن المرة هذى الباين حتى الخانب أعمى,انا قاعد حاير شنى كان يبي يديير بالنظارة اللى خنبها.
باهى توا نجو لحكاية التعنفيق , الصراحة انى مامديتش ايدى على الخانب لكن تقريبا اكثر من 10 شباب حصلو فيه على الاقل تعنفيقة وحدة , وهذا يوضح قداش الشعب الليبى متكافل و متعاون مع بعضه لكن فى التعنفيق بس وهدا علاش جى المثل متاع عمية وشدت خانب والباين اولاد الشارع كلهم عمى وماصدقو طاحو فى خانب .
انا مريت بمشكلة التعنفيق هذى مرة وحدة فى حياتى وانشاء الله معاش تتعاود, من سنتين فاتو كنت طالع من الساحة الخضراء بالسيارة وكان فيه واحد قاص على رجليه وما انتبهتلاش وماوقفتلاش و معجباش اللى صار وضرب السيارة برجله ولا بيده مش عارف وقعد يفتفت ويقلل فى ادبه , انى صخنت نزلتله من السيار وقلتله خيرك شنى فيه , زاد منن الدوة الفاضية شديته مع سوريته وخنقته و فى ثوانى جميع الاشكال المعفنة والمصيصة جت تجرى من جيهة باب الحرية ومن عمر المختار و رخيت صاحبنا و بدو يشحو فيا من كل جيهة وانى ضلمت عليا معاش فيه كيف نهرب , محدش بدى يضرب يشنتلو فيا بس و ما نبيش نقول كانو اكثر من خمسين نفر ملتمين عليا لان أخر حاجة كنت نفكر فيها هى انى نعدهم , الصراحة كنت نفكر فى سيارتى شنى بيصير فيها , وللعلم سيارة النجدة كانت واقفة مقابلنا ولكن لا حياة لمن تنادى , الكلام هذا كله كان اقل من دقيقة , وباش ما نعطلش وما نديرش روحى بطل وكيف طلعت من المشكلة هذى خلى نقوللكم الاعجوبة اللى صارت , من وسط الزحمة المصيصين بدو يوسعو معرفتش علاش لكن لما شبحت المخلوق اللى خاش للنص تمنيت حتى انى نوسعله معاهم , لما بدا يتكلم عرفته انه من البشر لان شكله ما يوحيش بأي ملامح انسان, شنى فيه قال والكل ردو بصوت واحد كان بيضرب سموعة, شبحلى من فوق لى لوطا والباين سخف عليا حط ايده على كتفى وعطانى عنفقة مش حننساها طول حياتى , قالى روح ومعاش نبى نشبح وجهك فى الجيهة هذى وطبعا مع اضافة بعض الكلمات اللى متنقالش .
انا مش فخور باللى صار لكن لولا هالعنفقة لكانو مسحو بيا الساحة مسح , والرجولة تحضر وتغيب فايللى تعنفق فالناس اليوم غدوة نهارك احرف.
the summary for the whole thing is that the other day a shop lifter got caught in my neighborhood and the weired funny thing was the thing he stole , it was a pair of glasses not sunglasses but a optical glasses ,I wonder what he wanted to do with them .
