امس فى الليل جانى كابوس نوضنى من النوم , حلمت انى واقف فى طابور و الطابور هذا مستقيم و مافيش حد يقص ولا ينقز لغاية ما وصل فيا الدور نوضت مخلوع , تعوذت من الشيطان لقيت روحى فى السرير ففرحت الحمد لله , معقول فى ليبيا وطابور مستقيم أعوذ بالله من الشيطان الرجيم .
انا ما فيش مرة ولو مرة واحدة وقفت فى اى طابورفيه أكثر من ثلاثة أشخاص فى ليبيا إلا وصارت فيه مشكلة ضرورى ما يجى واحد يقص و يلخبط الدنيا كلها , هذا لو فيه طابور اصلا لان الغالبية عبارة عن كدس من الناس , هذا النظام الجديد اللى حنى اخترعناه , تكدسو والصحيح فى الجسم او الوجه يتسقد فى الاول , خلي نعطيكم بعض الامثلة .
فى السوبر ماركت واقفين عادى فى الطابور جى واحد شاد باكو حليب قص قدامى ومد الفلوس , نفخت نفخة لين حسيت النار بتطلع من خشمى و فنصت فيه شبحلى ومش عاجبه اللى صاير , قلتله غير استأذن راهو بنادمية اللى قدامك , حتى صاحب المحل معجبتاش دوتي , قال : معليشى عنده باكو حليب واحد بس , قلتله كانا غير يستأذن نخلصهوله حتى انى الباكو , علاش معندناش احترام ,مش عارف علاش .
فى أى مقهى نطلب اى حاجة , زوز طابونة ,بيتسا,نص بالدحى اى حاجة المهم نقعد نستنى ويجى واحد بعدى وياخد نفس الحاجة اللي طلبتها قبلى, علاش عندنا الواسطة فى كل شئ, مش عارف علاش.
و مرة في مطعم الكباب متاع راس حسن واقفين فى الطابور زى الناس واحد لابيه لا عليه نادى ولده الصغير و قاله هاك الفلوس وبرا قص القدام فى الطابور وخود 6 كباب , توا مش الواحد يمزطله راسه على الحيط هذا ولا شنى, يعلم فى الولد القصان من توا بكري بكري باش ما يحصلش حصلته هوا توا .
فى الجوازات فى المطار انت واقف فى الطابور ستين واحد يقص قدامك ويحساب روحه دار حاجة كبيرة لما يختم الجواز قبل الناس , انا ديما نختم اخر .واحد وننزل نلقى شنطتي تستنى فيا واللى قصو كلهم قاعدين يستنو , علاش حنى فالحين فى التفشيك على بعض, مش عارف علاش .
فى أى جنازة انت واقف وتضرب فيك الشمس وتبى تعزي وتحصل الاجر تلقى ناس جاية باش بتورى وجهها وخلاص يتداعكو وينقزو فى نص الطابور, علاش تعب فى روحك يا بنادم مش عارف علاش.
فى الطريق لما تصيير زحمة تلقى السيارات قريب تركب فوق بعضها كل واحد يبي يوصل الاول والقصان على مفاصله من اليمين واليسار, الناس شايطة فيها النار , مش عارف علاش .
في الشيل ( محطة البنزين) انت واقف فى طابور السيارات يجى واحد بقمة الوقاحة والبرادة وصحة الوجه يجي بسيارته من قدام ويوخرها للماكينة , انا مرة حضرت عركة فى الشيل على خاطر القصان هذا , متاع الشيل قال للراجل حول سيارتك برا شد الطابور . الراجل سكر راسه يبى يعبى, متاع الشيل سخن و قاله تى والله ما تحولهاش الا لما نصب عليها بنزينة , ونتشلك فيها النار هنى, أحلى حاجة فى ليبيا تصكير الراس مش عارف علاش.
البنات والنساويين مرة مرة يفلفزولى فى رقبتي حتي هما ,تجي تقص قدام الطابور ببرودة وعادي وتاخد حاجتها قبل الكل من غير إحم ولا تستور تقول فايتة على صفة لوح مش ناس واقفة تستني , يأنسة يا أبلة يا أخت يا أمى يا هووه غير علاش القصان بس , مش عارف علاش .
خاطرى نعرف شني مشكلتنا مع الطابور ,علاش مفيش صبر , علاش الاستعجال , الكل يفكر غير نسقد روحى بس و طز فى الباقى.
ستالين ولا مش عارف منى زمان لما شد روسيا كان مداير قناصين فى اماكن الطوابير و اى واحد غير يمد زومته بس ( يطلع وجهه) من الطابور يصلفقوه برصاصة فى جبهته على طول , ياريت تطبق الفكره هذى هنى باش الليبيين كلهم تبدا جبهتهم منقوبة والواحد يوقف في طابور زي الناس .
يلا, شكلى توا بنمشي نشد طابور باش نمحي اثار الكابوس اللى شفته ونولي للواقع .
